|| 01 - ప్రియుడా నా చెలికాడా....!! || by Mercy Margaret
-----------------------------------------------------------------
రాలిపొయిన ఆకులన్నీ


గాలికి కొట్టుకుపోయి


తొలకరి వర్షం ఆసాంతం తడిపి


గాలి గుస గుసగా కొన్ని ఊసులు


మోసుకొనొచ్చి మెత్తగా తడుముతున్నప్పుడు



చినిగి పొయిన గుండెకు


కుట్లేసుకుంటూ


మనసుకు అంటుకున్న 

మాటల మసి తుడుచుకుంటూ

ఆకాశం వైపెత్తిన కళ్లు కన్నీల భాష

మాట్లాడుతుంటే


దృష్టి తొలగినందుకు చేతి వేలికి గుచ్చుకున్న

సూది

కారుతున్న రక్తాన్ని చూసి క్షమాపణ అడిగినా


ఏం చేయగలను??

ఆ నొప్పి కన్నా నీ రాక కోసం ఎదురుచూసే

ఈ భాదే బాగుందని చెప్పడం కన్నా


ప్రియుడా

నా చెలికాడా....!!


ఇంకెందుకు ఆలస్యం ??


నీ చూపుల కిరణాలు తాకి

చిరుగుగుండె తావుల్లో

చిగురులు పుట్టేలా

వసంతంలో మేను మైమరిచేలా

జాగుచేయక రా..!!

--------- (4/5/2013)-------------

( @ copy rights reserved)